يالله وانا طالبك تغفر لي ذنوبي ياغفور
ارجيك والجالك وأنا اسألك واعيد المسأله
لو ماتطهرني بعفوك ماتطهرني البحور
جيتك وذنبي قد تعلّى غاربي يامثقله
انا من الطين انخلقت اخطي ولانيب معذور
قامت علي الحجة بدعوة رسلك المرسله
مؤمن بتوراتك وانجيلك ومؤمن بالزبور
وبسنة محمد وآيات الكتاب المنزله
لكن خدعت بزخرف الدنيا وزادتني غرور
أبدت مفاتنها وورتني من العمر اجمله
طبعا بما اني بني آدم حصل مني قصور
واذنبت يامولاي ذنب بالخفا ماتجهله
اسألك تغفر لي وتستر موقفي يوم النشور
اليا القفت خلقك صحايفها وهي مستذهله
من يستلمها بالشمال افلس وهو يدعى ثبور
ومن يستلمها باليمين افلح لخير المنزله
واسألك ياربي تعاوني على نيل الأجور
احيا حياه مكسبي فيها من البر افضله
واسألك جاه مع هل الدنيا وحظ مايبور
ايضا وعرف مع هل الحكمه ورزق تكفله
من لاتهيا له مقام مع طويلين الشبور
يبكي على ماضاع من عمره وخيبات عمله
وان شاب رأسه لاترجى فيه تجبير الكسور
لاخير في تالي زمان ماتغانمت اوله
ومانيب ناسي قصة صارت وانا ازور القبور
لازلت افكر في غرابتها وبالي تشغله
ساعة ظهر لي شايب له حول قرنين محجور
في جوف قبر عن هل الدنيا طواه ويعزله
سلّم وجاء صوبي يقول:ابنشدك ياللي تزور؟
عن حالة الدنيا وعن وضع الزمان وعن هله
أنا مضى وقتي ومرت بي طويلات الدهور
والباقي بعمري بعيشه بينكم واستكمله
قلت:الزمان اللي يبارينا على خبرك يدور
الوقت نفسه ماتغير ماشي في جدوله
أما البشر لا والله غير من حد الجذور
صار انتقال من يمين الى يسار المنقله
استغرب الشايب من اللي قلت وبليا شعور
حط اليمين على الشمال وخاطره فيه اسئله
قال: افتني عن حالة الشيبان والشيخ الوقور
أهل الخير والراي والحكمه وضرب الأمثله
القدوه اصحاب الامور اللي تطاع بكل شور
اللي يفضون النزاع ويحكمون المشكله
قلت: البعض منهم على ماقلت في وصفك وقور
قدوه ولكن رأيهم ماينفرض في مسأله
الطاعة العميا بقا منها مجاملة الحضور
اللي تلاقيها مع اول فرصة متنصله
والبعض لاعبد يخاف الله ولا عبد شكور
لازهده شيبه من الدنيا ولاهو جملّه
بهيمة يرجع على منحاه الاول ومحصور
في لعبة بيلوته وريح زقارته ومعسلّه
والبعض الأخر شابت رموشه على درب الفجور
ينقل جوازه للسفر من مزبله لا مزبله
أشيمط زاني قضى عمره بحانات الخمور
والعايله ورع يغرربه وبنت مهمله
قال: افتني عن حالة الخفرات ربات الخدور
اللي تصان بيت عايلها وبابه تقفله
شيهانة تشمخ عفاف وتصقل فروخ الصقور
بين الفريق ببشتها الضافي وثوب تسبله
قلت: العذاري في زمنا ببغاوات الطيور
تقليد هرج وعرض ريش خلفها تستخمله
تلبس عباة ضيقت حول الردايف والخصور
فضيحة تكشف جسدها من علوه لاسفله
وموضة شيال تكشف الوجنات والوان الشعور
والمحرم تبدّل بجوال بيدها تحمله
لا فوحت صفر الدلال ولا عرفت غش القدور
تطبخ لها خدامة بالعايله متوكله
الام ماصانت عفا البنت من عمر الزهور
والاب ديوث تحكمه حرمة مسترجله
وشولن يتربى عيال ام التبرج والسفور
الا خنازير دماها بارده ومغفله
قال: افتني في حال الشباب الصلب صياد النمور
الفارس اللي ينطح خصومه بزند يفتله
الوافي الشهم الغيور اللي لعرض الجار سور
البار عند امه وابوه وعلم ربعه يشغله
قلت: الشباب بوقتنا وجهه مثل بدر البدور
والجسم من زود الرخا ماتنفتل فيه عضله
قصة شعور صيرتهم لا اناث ولا ذكور
والثوب راح ولابقى الا عالم متبنطله
ناس( فلنتينو) وناس تلبس( كرستانديور)
صار التنافس بينهم في لبسهم والجنتله
من كان يشرب من قرار البير مشروبه (بيور)
والبل راعيها غدا يشرب حليب ( النستله)
مامنهم اللي قام دون اعراض جيرانه غيور
من قام قالوا وشملقف حضرته ؟وشدخله
والوالدين حقوقهم ضاعت وعنهم في نفور
ان غاب عنهم لاتذكرهم ولاجاه الوله
بدا عليهم شلة تهوى الوطا بين الجحور
لوتعزله عنهم تبي له شأن كنك تقتله
ماراح يوم يشارك ربوعه بحزن ولاسرور
حتى ابن العم يعرفه بالوجه واسمه يجهله
بدل حكاه وضيع اسلومه وحاله في دبور
وان شاف ضيف يخش حتى انه يفارق منزله
ناظر لي الشايب بعين تجمع السبع البحور
يقول: انا لايمكن ادخل مجتمعكم واقبله
انتو لكم وقت تصدع من بلاويه الصخور
مايقعد الجمّال به ساعه ولو ضاع جمله
وسلامتكم ,,, ~ْ
الإثنين أغسطس 31, 2009 9:09 pm